BEAUTY WITH HOT WATER

 అందానికి గోరువెచ్చని నీళ్లు

ముఖాన్ని అందంగానే కాదు, ఆరోగ్యంగా ఉంచుకోవాలంటే కొన్ని జాగ్రత్తలు తీసుకోవాలి. 

ఇంతకీ అవేంటంటే..

* వాతావరణం ఏ మాత్రం చల్లగా ఉన్నా.. వేణ్నీళ్లతో ముఖాన్ని కడుక్కుంటూ ఉంటాం. అలాగే ఏ మాత్రం ఎండగా అనిపించినా చల్లనినీళ్లను ముఖంపై చల్లుకుంటాం. నిపుణుల ప్రకారం రెండూ సరికావు. మరీ వేడిగా, అలాగని చల్లగా కాకుండా ఏ రుతువులోనైనా గోరువెచ్చని నీటితో ముఖాన్ని కడుక్కోవడం శ్రేయస్కరం.

* సున్నితమైన చర్మాన్ని అదేపనిగా రుద్దడం వల్ల ఎర్రగా కందిపోతుంది. చర్మంపై పేరుకున్న మృతకణాలు తొలగించేందుకు అదేపనిగా రుద్దాలని లేదు. కేవలం మునివేళ్లతో మర్దన చేసుకుని, తరవాత కడిగేస్తే చాలు.

* ముఖంలో పేరుకున్న మురికీ, క్రిములు పూర్తిగా తొలగిపోవాలంటే ముందుగా మేకప్‌ని పూర్తిగా తుడిచేయాలి. క్లెన్సర్లు మేకప్‌ని తొలగించవు కాబట్టి మేకప్‌ రిమూవర్‌ని ఎంచుకుంటే మంచిది. ఆ తరవాతే ముఖాన్ని కడుక్కోవాలి.

* సబ్బులు చేతులూ, శరీరానికి మేలు చేస్తాయి కానీ, ముఖానికి కాదు. వాటి గాఢత చర్మం బరకగా మారేలా చేస్తుంది. అందుకే ముఖానికి మాత్రం ఫేషియల్‌ క్లెన్సర్‌ని వాడాల్సి ఉంటుంది. అది కూడా మన చర్మతత్వానికి నప్పేదై ఉండాలి.

* ముఖాన్ని శుభ్రం చేసుకునే ముందు చేతుల్ని కడుక్కోవాలి. లేదంటే చేతుల్లోని మురికీ, క్రిములు ముఖంలోకి చేరతాయి. దాంతో మొటిమలు మొదలవుతాయి.

* కొందరు రోజంతా అదేపనిగా ముఖాన్ని కడుక్కుంటూ ఉంటారు. కానీ అది సరైన పనికాదు. అలా చేయడం వల్ల చర్మం పొడిబారి, నిర్జీవంగా కనిపిస్తుంది. కొన్నిసార్లు అతిగా శుభ్రం చేయడం వల్ల కూడా చర్మంలో అధిక నూనెలు విడుదలై ఇబ్బంది పెడతాయి.